सुनसरी — आईसीसी महिला टी–२० विश्वकप ग्लोबल छनोट प्रतियोगितामा सहभागी नेपाली महिला क्रिकेट टोली आज आफ्नो दोस्रो खेलमा नेदरल्यान्ड्ससँग भिड्दैछ। समूह ‘बी’ अन्तर्गतको यो खेल बिहान ९ बजेदेखि कीर्तिपुरस्थित त्रिवि क्रिकेट मैदानमा सुरु हुनेछ।
नेपाल पहिलो खेलमा थाइल्यान्डसँग पराजित भएपछि समूह चरणबाट अघिल्लो चरणमा पुग्ने सम्भावना कायम राख्न आजको खेलमा जित निकाल्नैपर्ने अवस्थामा छ। प्रतियोगितामा नेदरल्यान्ड्सले भने जिम्बाबे र स्कटल्यान्डलाई पराजित गर्दै लगातार दुई जितसहित बलियो सुरुवात गरिसकेको छ।
महिला टी–२० अन्तर्राष्ट्रिय वरियतामा नेदरल्यान्ड्स १४औँ स्थानमा रहँदा नेपाल २१औँ स्थानमा छ। दुवै टोलीबीच हालसम्म भएका तीनवटै टी–२० अन्तर्राष्ट्रिय खेलमा नेपाल पराजित भएको तथ्यांकले पनि आजको खेल नेपालका लागि चुनौतीपूर्ण देखिन्छ।
समूह चरणबाट अघिल्लो चरणमा प्रवेश गर्न नेपालले बाँकी तीन खेलमध्ये कम्तीमा दुई खेल जित्नैपर्ने दबाबमा छ। नेदरल्यान्ड्सले आज जित हासिल गरेमा अघिल्लो चरणमा पुग्ने सम्भावना झनै बलियो बनाउनेछ।
नेपाली टोलीमा इन्दु बर्मा, पूजा महतो, सम्झना खड्का, बिन्दु रावल, रुबिना क्षेत्री, कविता कुँवर, रिया शर्मा, सोमु विष्ट, सीता राना मगर, काजल श्रेष्ठ, कविता जोशी, रोमा थापा, मनीषा उपाध्याय, रचना चौधरी र राजमती ऐरी समावेश छन्।
घरेलु मैदानको फाइदा उठाउँदै नेपालले आज इतिहास बदल्ने प्रयास गर्ने अपेक्षा गरिएको छ।