विराटनगर — गत प्रतिनिधिसभा निर्वाचनमा मोरङ क्षेत्र नं. ५ बाट स्वतन्त्र उम्मेदवारका रूपमा विजयी भएका सांसद योगेन्द्र मण्डलले नयाँ राजनीतिक दल दर्ता गर्ने तयारी गरेका छन्। मण्डलले आगामी फागुन २१ गते निर्धारित निर्वाचनलाई लक्षित गर्दै ‘राष्ट्रिय उर्जाशील पार्टी’ नामक दल दर्ता गर्न लागेको जानकारी दिएका छन्।
उनका अनुसार मंगलबार (आज) नै निर्वाचन आयोगमा दल दर्ताको प्रक्रिया अघि बढाइनेछ। मण्डल नेतृत्वको उक्त दलको चुनाव चिन्ह “कल” प्रस्ताव गरिएको छ। मण्डल स्वयं दलका संयोजक तथा प्रमुखका रूपमा रहनेछन्।
सांसद मण्डलले देशभरका ख्यातीप्राप्त व्यक्तिहरूलाई समेट्दै दललाई सशक्त राजनीतिक विकल्पका रूपमा अघि ल्याउने योजना बनाएको बताएका छन्। उनका अनुसार राष्ट्रिय उर्जाशील पार्टीले “सशक्त नागरिक, पारदर्शी शासन र उर्जाशील नेतृत्व” नारा अघि सार्दै आगामी निर्वाचनमा भाग लिने तयारी गरिरहेको छ।