काठमाडौँ । नेकपा (एमाले) ले आगामी मंसिर २७ देखि २९ गतेसम्म विशेष महाधिवेशन गर्ने प्रस्ताव गरेको छ।
पार्टीको केन्द्रीय समिति बैठक बुधबारदेखि सुरु भएको हो, जसमा अध्यक्ष केपी शर्मा ओलीले विशेष प्रस्ताव पेस गर्दै उक्त मितिमा महाधिवेशन गर्ने सुझाव दिएका हुन्।
यसअघि बसेको सचिवालय बैठकले मंसिरको अन्तिम साता महाधिवेशन गर्ने निर्णय गरिसकेको थियो। सोही निर्णयलाई औपचारिकता दिँदै केन्द्रीय समितिले अब ठोस मिति प्रस्ताव गरेको हो।
पार्टी स्रोतका अनुसार महाधिवेशनको तयारीका लागि विभिन्न उपसमितिहरू गठन गर्ने र नीतिगत दस्तावेजहरू तयारी गर्ने प्रक्रिया सुरु हुनेछ। महाधिवेशनमा आगामी राजनीतिक रणनीति, संगठन सुदृढीकरण र नेतृत्व संरचनासम्बन्धी विषयहरू मुख्य एजेन्डा हुने बताइएको छ।