सुनसरी। फागुन २१ गते हुने प्रतिनिधिसभा निर्वाचनको तयारीका लागि नेपाली कांग्रेसले गठन गरेका तीन प्रमुख समिति अझै पूर्ण हुन सकेका छैनन् । निर्वाचन नजिकिँदै जाँदा पनि घोषणापत्र तयारी, निर्वाचन परिचालन तथा प्रचार–प्रसार समिति अपूर्ण रहँदा पार्टीको तयारीप्रति प्रश्न उठ्न थालेको छ ।
कांग्रेसले घोषणापत्र तयारी समितिको संयोजकमा सभापति गगन थापा, निर्वाचन परिचालन समितिको संयोजकमा उपसभापति विश्वप्रकाश शर्मा र प्रचार–प्रसार समितिको संयोजकमा प्रवक्ता देवराज चालिसेलाई तोकेको छ । तर ती समितिमा सदस्य चयन नहुँदा औपचारिक रूपमा काम सुरु हुन सकेको छैन ।
पार्टी प्रवक्ता देवराज चालिसेले निर्वाचन केन्द्रित समितिहरूलाई पूर्णता दिने जिम्मेवारी सभापतिको रहेको र सभापति व्यस्त रहेकाले ढिलाइ भएको जानकारी दिए । “घोषणापत्र मस्यौदा समिति, निर्वाचन परिचालन समिति र प्रचार–प्रसार समिति अझै पूर्ण भएका छैनन्,” उनले भने, “सभापति आफ्नो निर्वाचन क्षेत्रबाट हालै काठमाडौँ आउनुभएको छ । अब छलफल गरेर टुंग्याइनेछ ।”
पार्टीका निकट स्रोतका अनुसार समितिमा कस–कसलाई समावेश गर्ने भन्ने विषयमै सहमति नजुट्दा निर्णय रोकिएको हो । विशेषगरी पूर्वसभापति शेरबहादुर देउवा समूह र डा. शेखर कोइराला समूहका शीर्ष नेताहरूलाई समितिमा राख्ने विषयमा सहमति बन्न सकेको छैन । ती समूहलाई समेट्न नसक्दा पार्टी एक ढिक्का देखिन नसक्ने चिन्ता नेतृत्वमा रहेको बताइन्छ ।
गत पुस २७ देखि ३० गतेसम्म काठमाडौँको भृकुटीमण्डपमा सम्पन्न विशेष महाधिवेशनबाट गगन थापा सभापतिमा सर्वसम्मत चयन भएका थिए । उक्त विशेष महाधिवेशनलाई निर्वाचन आयोगले मान्यता दिएको भए पनि देउवा र कोइराला समूहले स्वीकार नगरेको अवस्था छ । यही आन्तरिक मतभेदका कारण निर्वाचन केन्द्रित समितिहरूले समयमै पूर्णता पाउन नसकेको विश्लेषण गरिएको छ ।