सुनसरी— आगामी फागुन २१ गते हुने प्रतिनिधिसभा सदस्य निर्वाचनका लागि मोरङ क्षेत्र नम्बर ५ मा उम्मेदवारी दर्ता उत्साहजनक देखिएको छ। आइतबार विराटनगरस्थित निर्वाचन अधिकृतको कार्यालयमा प्रमुख राजनीतिक दलदेखि स्वतन्त्र उम्मेदवारसम्म गरी कुल २२ जनाले मनोनयन दर्ता गराएका छन्।
यस क्षेत्रबाट अघिल्लो पटक स्वतन्त्र उम्मेदवारका रूपमा निर्वाचित योगेन्द्र मण्डलले यसपटक नयाँ राजनीतिक दल गठन गरी चुनावी मैदानमा उत्रिएका छन्। उनले ‘राष्ट्रिय ऊर्जाशील पार्टी’को नेतृत्व गर्दै दिउँसो ३ बजे उम्मेदवारी दर्ता गराएका हुन्।
सत्तारुढ र प्रतिपक्षी प्रमुख दलहरूले पनि प्रभावशाली उम्मेदवार अघि सारेका छन्। नेपाली कांग्रेसबाट फुलकुमार लालवानी, नेकपा (एमाले)बाट मनोज अग्रवाल र नेपाली कम्युनिस्ट पार्टीबाट शिवकुमार मण्डलले उम्मेदवारी दिएका छन्। जनता समाजवादी पार्टी (जसपा) नेपालबाट राजकुमार यादव पनि प्रतिस्पर्धामा छन्।
नयाँ शक्ति र वैकल्पिक राजनीतिलाई जोड दिँदै राष्ट्रिय स्वतन्त्र पार्टी (रास्वपा) ले आशा झालाई महिला उम्मेदवारका रूपमा अघि सारेको छ। राष्ट्रिय प्रजातन्त्र पार्टी (राप्रपा)बाट कुमोद रायले उम्मेदवारी दर्ता गराएका छन् भने जनमत पार्टीबाट परमेश्वर मुर्मु र राष्ट्रिय मुक्ति पार्टी नेपालबाट नेरश कुमार लाभ उम्मेदवार बनेका छन्।
दलीय उम्मेदवारसँगै स्वतन्त्र उम्मेदवारहरूको उल्लेखनीय उपस्थिति पनि देखिएको छ। स्वतन्त्रतर्फ अमर कुमार यादव, मो. रेजा हुसैन, विकास श्रेष्ठ, ममता यादव, सुजित कुमार साह, राजकुमार राजवंशी लगायतले उम्मेदवारी दर्ता गराएका छन्।
२२ जनाको उम्मेदवारी दर्तासँगै मोरङ–५ मा बहुकोणीय र रोचक चुनावी प्रतिस्पर्धा हुने अनुमान गरिएको छ। निर्वाचन अधिकृत मदनप्रसाद पराजुलीका अनुसार उम्मेदवारको नामावली प्रकाशन तथा दाबी–विरोधको प्रक्रिया तोकिएको कार्यतालिकाअनुसार अगाडि बढाइनेछ।