सुनसरी- महानगरपालिकाका पूर्वमेयर तथा राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र साह (बालेन) ले झापा–५ बाट प्रतिनिधिसभा सदस्यका लागि उम्मेदवारी दर्ता गरेपछि त्यहाँको चुनावी माहोल तातेको छ।
मंगलबार सयौँ समर्थकसहित झापा पुगेका बालेनले निर्वाचन कार्यालयमा पुगेर औपचारिक रूपमा मनोनयन दर्ता गराएका हुन्। उनको प्रस्तावकमा भेषराज भट्टराई र समर्थकमा भूमिनन्द बराल रहेका छन्।
झापा–५ लाई यसपटक ‘हाई प्रोफाइल’ निर्वाचन क्षेत्रका रूपमा हेरिन थालेको छ। यसै क्षेत्रमा पूर्वप्रधानमन्त्री तथा एमाले अध्यक्ष केपी शर्मा ओली र नेपाली कम्युनिस्ट पार्टीका तर्फबाट रञ्जित तामाङले पनि उम्मेदवारी दर्ता गर्ने तयारी गरेका छन्।
बालेनको आगमनसँगै झापा–५ मा नयाँ राजनीतिक ध्रुवीकरण देखिन थालेको छ। स्थापित दल र नयाँ राजनीतिक शक्तिबीचको यो प्रतिस्पर्धालाई चासोका साथ हेरिएको छ। रास्वपाले बालेनलाई भावी प्रधानमन्त्रीको रूपमा अघि सार्दै आएको छ भने एमालेले अनुभवी नेता ओलीलाई नै आफ्नो प्रमुख अनुहार बनाएको छ।
स्थानीय मुद्दा, राष्ट्रिय राजनीति र नेतृत्वको वैकल्पिक धारलाई लिएर हुने यो चुनावी भिडन्तले झापा–५ को परिणाम मात्र होइन, समग्र राष्ट्रिय राजनीतिमा पनि प्रभाव पार्ने अनुमान गरिएको छ।