सुनसरी। आगामी फागुन २१ गते हुने प्रतिनिधिसभा सदस्य निर्वाचनलाई लक्षित गर्दै नेपाली सेनाले करिब ८० हजार जनशक्ति परिचालन गर्ने तयारी गरेको छ। निर्वाचनलाई सुरक्षित, निष्पक्ष र शान्तिपूर्ण रूपमा सम्पन्न गराउने उद्देश्यले एकीकृत सुरक्षा योजना २०८२ कार्यान्वयनमा ल्याइने भएको हो।
नेपाली सेनाका सहायक रथी तथा प्रवक्ता राजाराम बस्नेतका अनुसार निर्वाचनसम्बन्धी एकीकृत सुरक्षा योजना सरकारबाट अनुमोदन भइसकेको छ भने सेनाको परिचालन सम्बन्धी प्रस्ताव राष्ट्रिय सुरक्षा परिषद् हुँदै राष्ट्रपतिबाटसमेत स्वीकृत भइसकेको छ। सोही योजनाअनुसार निर्वाचनको करिब एक महिना अघिदेखि सेनाको फौज फिल्डमा परिचालन गरिनेछ।
उनका अनुसार निर्वाचन सुरक्षाका लागि सेनाले तीन चरणमा काम गर्नेछ। निर्वाचनपूर्वको चरणमा मतपत्र छपाइको सुरक्षा, संवेदनशील तथा महत्त्वपूर्ण संरचनाको संरक्षण सेनाको मुख्य जिम्मेवारी रहनेछ।
नेपाल प्रहरी र सशस्त्र प्रहरी बल नेपालसँगको समन्वय तथा सहकार्यमा विमानस्थल, कारागारलगायत महत्वपूर्ण संरचनाको सुरक्षा व्यवस्था पनि नेपाली सेनाले गर्ने जनाएको छ। निर्वाचन अवधिभर सुरक्षा संयन्त्रबीच समन्वयलाई अझ प्रभावकारी बनाइने सेनाको भनाइ छ।