सुनसरी– मोरङको केराबारी गाउँपालिका–५ लाफाटोलमा सोमबार प्रदेश नम्बर १–०६–००१ झ ०००४ नम्बरको एम्बुलेन्समा गाँजा तस्करीको आरोपमा दुईजना पक्राउ परेका छन्।
प्रहरीले पूर्व सुचनाको आधारमा एम्बुलेन्स पछ्याउँदै छेकेबार लगाएको थियो। प्रहरी निरीक्षक राजीव गिरी र प्रहरी सहायक निरीक्षक फजिन्द्र तोलाङ्गीको टोलीले रोकेपछि चालक निश्चल राई (३५) र खगेन्द्र लिम्बु (२०) एम्बुलेन्सबाट भाग्न खोजे। केही समयपछि प्रहरीले एक राउण्ड गोली चलाएर उनीहरूलाई नियन्त्रणमा लिन सफल भएको मोरङ प्रहरीले जनाएको छ।
बरामद एम्बुलेन्समा १६ पोका लागुऔषध गाँजा फेला परेको छ। एम्बुलेन्स पूर्वप्रधानमन्त्री स्वर्गीय सूर्यबहादुर थापाको नाममा स्थापना भएको प्रतिष्ठानको हो र शहीदभूमि गाउँपालिका–१ खाल्सा छिन्ताङ, धनकुटाबाट संचालित रहेको छ।
मोरङ प्रहरीका प्रवक्ता कोपिला चुँडालले घटनाको सम्बन्धमा थप अनुसन्धान जारी रहेको बताइन्।