सुनसरी- जेनजी आन्दोलनको क्रममा गत २४ भदौमा देशका विभिन्न कारागार तथा बाल सुधार गृहबाट फरार भएका कैदीबन्दीमध्ये ११ जनालाई सिरहा प्रहरीले हालसम्म पक्राउ गरेको छ। पक्राउ परेकामध्ये दुई जना नाबालक रहेको जिल्ला प्रहरीले जनाएको छ।
जिल्ला प्रहरी कार्यालयका अनुसार जलेश्वर, नख्खु, जगन्नाथ देवल, सप्तरी, सिन्धुली, केन्द्रीय कारागार र वीरगञ्जस्थित बाल सुधार गृहबाट फरार भएका कैदीबन्दीहरू पक्राउ परेका हुन्।
प्रहरी निरीक्षक ओमप्रकाश पण्डितका अनुसार पक्राउ परेकामध्ये नौ जनालाई सम्बन्धित कारागार तथा सुधार गृहमा बुझाइसकिएको छ भने बाँकी दुई जनालाई बुझाउने प्रक्रिया जारी छ।
यसैबीच, सिरहा प्रहरीले धनगढीमाई नगरपालिका–११ डाबरटोलस्थित चितवा खोला नजिक सोमबार दिउँसो बेवारिसे अवस्थामा एक नाल भरुवा बन्दुक बरामद गरेको छ। उक्त बन्दुक कसको हो र कसरी त्यहाँ आइपुग्यो भन्ने विषयमा इलाका प्रहरी कार्यालय लहानले अनुसन्धान गरिरहेको जनाएको छ।