ईनरुवा। सुनसरीको इनरुवा नगरपालिका–९ नहरचोक क्षेत्रमा लागूऔषध ओसारपसार भइरहेको विशेष जानकारीका आधारमा प्रहरीले गरेको कारबाहीमा ठूलो मात्रामा गाँजा बरामद भएको छ।
मंगलवार साँझ इनरुवा–जाल्पापुर भित्री सडकखण्डमा जाँचका क्रममा बा ३ च ५५८५ नम्बरको स्कारपियो रोकिनु पर्नेमा चालक फरार भएपछि प्रहरीले सतर्कता बढाएको थियो। पछि अस्थायी प्रहरी चौकी साम्बला, पोखरीचोकबाट खटिएको टोलीले नहरचोकबाट करिब १०० मिटर टाढा उक्त गाडी छाडिएको अवस्थामा फेला पारेको हो।
गाडीको तलासी गर्दा प्लास्टिकका बोरामा प्याक गरिएको १६ बोरा बराबर करिब ४६० केजी गाँजा बरामद गरिएको जिल्ला प्रहरी कार्यालय सुनसरीले जनाएको छ। चालक भने फरार रहेका छन् र उनको खोजतलास तीव्र रूपमा चलिरहेको प्रहरीको भनाइ छ।
बरामद गरिएको गाडी तथा लागूपदार्थलाई कानुनी प्रक्रिया पूरा गर्दै जिल्ला प्रहरी कार्यालय सुनसरीमा राखी थप अनुसन्धान अघि बढाइिएको छ।