इनरुवा । प्रतिनिधिसभा सदस्य निर्वाचन नजिकिँदै गर्दा निर्वाचन आयोगले देशभरका मतदानस्थलहरूको व्यापक पुनरावलोकन गरी संरचनागत समायोजन गरेको छ। मतदाताको पहुँच सहज, सुरक्षित र व्यवस्थित बन्ने उद्देश्यका साथ आयोगले १६८ नयाँ मतदानस्थल थपेको हो।
आयोगका प्रवक्ता नारायणप्रसाद भट्टराईका अनुसार आइतबार बसेको आयोगको वैठकले अब कुल १० हजार ९६७ मतदानस्थल कायम गर्ने निर्णय गरेको छ। यसअघि १० हजार ८९२ मतदानस्थल रहेका थिए।
पुनरावलोकन प्रक्रियामा ९३ मतदानस्थल खारेज गर्दै भूगोल, जनघनत्व, दूरी तथा पहुँचजस्ता सूचकका आधारमा केही मतदानस्थलहरू साविककै नजिकैका स्थानमा सारिएका छन्। त्यस्तै, कतिपय मतदानस्थलका नाम, ठेगाना तथा विवरणमा रहेको त्रुटि समेत सच्याइएको आयोगले जनाएको छ।
आयोगका अनुसार आगामी निर्वाचनमा मतदातालाई सहज पहुँच सुनिश्चित गर्ने, भीडभाड न्यूनीकरण गर्ने र मतदान प्रक्रिया झन् व्यवस्थित बनाउने उद्देश्यका साथ पुनर्संरचना गरिएको हो।