इनरुवा । हालैको अविरल वर्षापछि आएको सुनसरी खोलाको बाढीमा ज्यान गुमाएका भोक्राहा नरसिंह गाउँपालिका–७ का अन्दाजी ५५ वर्षीय उपेन्द्र रोहिता (यादव)का परिवारलाई गाउँपालिकाले राहत सामग्री हस्तान्तरण गरेको छ ।
गएको साता घर नजिकै बाख्राको लागि घाँस ल्याउन खेतमा गएको बेला बाढीले बगाएर उनको मृत्यु भएको थियो । उक्त घटनापछि पालिका अध्यक्ष अजमल अख्तर आजादको नेतृत्वमा गएको टोलीले शुक्रबार मृतक परिवारलाई भेटी सहानुभूति प्रकट गर्दै राहत सामग्री वितरण गरेको हो ।
भेटघाटमा लेखा अधिकृत दिपेन्द्र चौधरी, स्वास्थ्य शाखा प्रमुख हिरा शाह, समाजसेवी रामेश्वर मरवैता, वडा नं. ७ का वडाध्यक्ष बौवालाल यादव, नेपाली कांग्रेस जिल्ला सदस्य सुनिल शाह, आरिफ हुसेन, सविर मंसुरी लगायतका जनप्रतिनिधि, राजनीतिक दलका कार्यकर्ता तथा कर्मचारीहरू सहभागी थिए ।
मृतक परिवारलाई प्रदान गरिएको राहत सामग्रीमा चामल ५० केजी, खानेतेल ५ लिटर , दाल, नुन, साबुन, भुजा, प्याकेज गरिएको खानेपानी लगायतका अन्य सामग्री हस्तान्तरण गरेका छन् ।
पालिका अध्यक्ष आजादले मृतक परिवारलाई तत्काल राहतका रूपमा सामग्री हस्तान्तरण गरिएको जनाउँदै आगामी दिनमा काजकिरिया खर्च र क्षतिपूर्ति वितरण प्रक्रिया पनि अघि बढाइने बताए ।
उनीहरूले विपद्को समयमा स्थानीय सरकार पीडित परिवारको साथमा रहने र कुनै पनि परिवार राहतविहीन नबनोस् भन्ने उद्देश्यका साथ पालिकाले सहयोग अभियान चलाइरहेको जानकारी दिएका छन् । पालिकाले मृतकप्रति श्रद्धाञ्जली अर्पण गर्दै परिवारजनलाई धैर्य धारण गर्न आग्रह गरेको छ ।