विराटनगर । कोशी प्रदेश प्रहरी प्रमुखका रूपमा प्रहरी नायव महानिरीक्षक (डिआइजी) विनोद घिमिरेले औपचारिक रूपमा पदभार सम्हालेका छन्। गृह मन्त्रालयको मंसिर ८ गतेको निर्णयअनुसार कोशी प्रदेश प्रहरी कार्यालय विराटनगरमा सरुवा भएका घिमिरेले नयाँ जिम्मेवारीसँगै संगठनलाई परिणाममुखी र प्रविधिमैत्री बनाउने प्रतिवद्धता व्यक्त गरेका छन्।
पदभार ग्रहणपछि कार्यालयको सभाहलमा आयोजित विशेष कार्यक्रममा उनले भर्चुअलमार्फत जिल्ला प्रहरी प्रमुख र मुद्दा चल्ने इकाई प्रमुखहरूलाई निर्देशन दिँदै बदलिँदो समय र प्रविधिसँग तालमेल मिलाउँदै काम गर्न आग्रह गरे।
“जस्तोसुकै विषम परिस्थिति आए पनि प्रहरी कहिल्यै पछाडि हट्दैन,” भन्दै उनले अपराध नियन्त्रण, शान्ति–सुरक्षा र जनविश्वास मजबुत बनाउने लक्ष्य प्रस्तुत गरे।
डिआइजी घिमिरेले संगठनभित्र उत्कृष्ट काम गर्ने प्रहरीलाई तत्काल पुरस्कृत गर्ने र गैरकानुनी गतिविधिमा संलग्न जो–कोहीलाई कडा कारबाही हुने चेतावनी पनि दिए। कानून कार्यान्वयन, समन्वय, भातृत्व र सामूहिकतामार्फत प्रदेश प्रहरीलाई थप सक्षम बनाइने उनको भनाइ थियो।
घिमिरेको नेतृत्वपछि कोशी प्रदेश प्रहरी ‘गतिशील, अनुशासित र आक्रामक मोड’मा काम गर्ने अपेक्षा गरिएको छ।