विराटनगर — करिब नौ महिनादेखि नेतृत्वविहीन रहँदै आएको कोशी प्रदेशसभाले नयाँ सचिव पाएको छ। पूर्व संघीय संसद सचिवालयका सचिव सुदर्शन खड्कालाई प्रदेशसभा सचिवमा नियुक्त गरिएको हो। सभामुख अम्बरबहादुर विष्टको सिफारिसमा प्रदेश प्रमुख परशुराम खापुङले उनलाई नियुक्त गरेका हुन्।
संघीय संसद सचिवालयबाट स्वेच्छिक अवकाश लिएका खड्का अब प्रदेशसभाको प्रशासनिक जिम्मेवारी सम्हाल्नेछन्। प्रदेशसभा सूचना अधिकारी निरज ढकालका अनुसार, खड्काको शपथग्रहण आगामी बुधबारका लागि तय गरिएको छ।
गत भदौ २४ गते ‘जेनजी आन्दोलन’का क्रममा प्रदेशसभा भवनमा आगजनी र लुटपाट भएपछि सभा अस्थायी रूपमा कटहरी गाउँपालिका–१ स्थित जम्टोकी कृषि बजारमा सार्ने तयारी भइरहेको छ। यस्तो अस्तव्यस्त अवस्थामै नयाँ सचिवले काम थाल्ने भएका छन्। संघीय संसदमा लामो अनुभव भएका खड्काबाट काम सहज हुने विश्वास गरिएको छ।
यसअघि रहेका तत्कालीन सचिव गोपालप्रसाद पराजुलीलाई सर्वोच्च अदालतले पशुपति क्षेत्र विकास कोषको जग्गामा बालुवाखानी सञ्चालन गर्न दिएर भ्रष्टाचार गरेको ठहर गर्दै ६ वर्ष कैद र जरिवाना सजाय सुनाएको थियो। सो फैसलापछि उनी स्वतः पदमुक्त भएका थिए।
भक्तपुरको चाँगुनारायण–४ निवासी खड्काले अर्थशास्त्र र जनप्रशासनमा स्नातकोत्तर र शिक्षाशास्त्रमा स्नातक (बीएड) गरेका छन्। उनले भारत, जर्मनी, चीन, अमेरिका, श्रीलंका, थाइल्यान्ड, मलेसिया, सिङ्गापुर र हङकङ लगायत देशको अध्ययन भ्रमणसमेत गरिसकेका छन्।