इनरुवा- सुनसरीको भोक्राहा नरसिंह गाउँपालिका–७ स्थित हुलाकी राजमार्गको भुटाहा पुल नजिक ट्रक र मोटरसाइकल एक आपसमा ठोक्किँदा एक महिलाको ज्यान गएको छ।
सप्तरीतर्फबाट हरिनगरा जाँदै गरेको प्रदेश १–०२–००१ ख ९२०७ नम्बरको ट्रक र विपरीत दिशाबाट आइरहेको प्रदेश १–०२–०४१ प ४४३० नम्बरको मोटरसाइकल आपसमा ठोक्किँदा दुर्घटना भएको प्रहरीले जनाएको छ। दुर्घटनामा मोटरसाइकल चालक भोक्राहा–४ का ३५ वर्षीय लक्ष्मण मेहता र पछाडि सवार भोक्राहा–२ की करिब ४० वर्षीया रसिदा खातुन घाइते भएका थिए।
घाइते दुवैलाई उपचारका लागि विराटनगरस्थित गोल्डेन अस्पताल पुर्याइएको थियो। अस्पतालले रसिदा खातुनलाई उपचारको क्रममा मृत घोषणा गरेको हो भने चालक मेहताको अवस्था गम्भीर रहेको र थप उपचार भइरहेको प्रहरीले जानकारी दिएको छ।
दुर्घटनामा संलग्न ट्रक र मोरङ ग्रामथान गाउँपालिका–५ का ३२ वर्षीय चालक रमेश घिमिरेलाई प्रहरीले नियन्त्रणमा लिएर जिल्ला प्रहरी कार्यालय सुनसरीमा राखी आवश्यक अनुसन्धान सुरु गरेको छ।