इनरुवा — सुनसरीको गढी गाउँपालिकाले विभिन्न कार्यक्रमअन्तर्गत कार्यरत पाँच जना करार कर्मचारीको सेवा सम्झौता रद्द गरेको छ। गाउँकार्यपालिकाको मिति २०८२ असोज १७ गते बसेको बैठकले नेपाल सरकारको २०८२ असोज ५ गतेको निर्णय र सम्बन्धित मन्त्रालयको परिपत्रअनुसार यस्तो निर्णय गरेको हो।
गाउँपालिकाले जारी गरेको सार्वजनिक सूचनाअनुसार साझेदारी संस्था सुधार कार्यक्रमअन्तर्गत नियुक्त ती कर्मचारीहरूको करार सम्झौता २०८२ साउन १ गतेदेखि प्रभावकारी हुनेगरी खारेज गरिएको छ।
रद्द गरिएका पदहरूमा १ जना कानुनी सल्लाहकार, १ जना स्वकृत सचिव (अध्यक्ष), १ जना अपाङ्ग सहयोगी सहायक, १ जना रोजगार सहायक र १ जना प्राविधिक सहायक रहेका छन्। तीमध्ये रोजगार र प्राविधिक सहायक प्रधानमन्त्री रोजगार कार्यक्रमअन्तर्गत कार्यरत थिए।
गाउँपालिकाका अध्यक्ष आशा नारायण चौधरी र प्रमुख प्रशासकीय अधिकृत सुमिता रिमालले संयुक्त रूपमा हस्ताक्षर गरेको सूचनामा मन्त्रालयको निर्देशनअनुसार निर्णय तत्काल कार्यान्वयनमा ल्याइसकिएको उल्लेख गरिएको छ। गाउँपालिकाले यो निर्णय सबै सरोकारवालाहरूलाई जानकारीका लागि सार्वजनिक गरेको जनाएको छ।