(सुनसरी) । सुनसरीको बर्जु गाउँपालिका–५ स्थित भित्री सडकखण्डबाट प्रहरीले ठूलो परिमाणमा लागुऔषध गाँजा बरामद गरेको छ। प्रहरीले करिब २ सय ५७ किलो ४५ ग्राम गाँजा बरामद गरेको हो।
जिल्ला प्रहरी कार्यालय सुनसरीका अनुसार कार्तिक २१ गते राति करिब ८ बजे दुहवी र सितागंज प्रहरीको संयुक्त टोलीले सो कारबाही गरेको हो। बागमती प्रदेश–०१–०२७ च ०२४० नम्बरको स्कार्पियो गाडी चेकजाँच गर्ने क्रममा गाडीभित्र लुकाइराखिएको अवस्थामा गाँजा फेला परेको प्रहरीले जनाएको छ।
प्रहरीका अनुसार कारवाहीका क्रममा गाडी चालक भने फरार रहेका छन्। प्रहरी टोलीले तत्काल गाँजा नियन्त्रणमा लिएर आवश्यक अनुसन्धान अघि बढाएको छ।
फरार चालकको खोजतलास जारी रहेको र सो घटनामा संलग्न अन्य व्यक्तिहरूको समेत खोजी भइरहेको जिल्ला प्रहरी कार्यालयले जनाएको छ।
प्रहरीले हालैको अवधिमा सुनसरी र आसपासका क्षेत्रमा लागुऔषध ओसारपसारमा वृद्धि भइरहेको भन्दै निगरानी र कारवाही अझ कडाइका साथ अघि बढाइने जनाएको छ।