काठमाडौँ । लोकसेवा आयोगले लिएका विभिन्न परीक्षा मार्फत आरक्षण कोटाबाट हालसम्म २६ हजारभन्दा बढी व्यक्तिले सरकारी सेवामा प्रवेश पाएका छन्।
आयोगले हालै राष्ट्रपति रामचन्द्र पौडेललाई बुझाएको आर्थिक वर्ष २०८१/८२ को वार्षिक प्रतिवेदनमा यस्तो तथ्यांक समावेश गरिएको छ। आयोगका अनुसार समावेशी प्रणाली लागू भएको २०६४ सालदेखि अहिलेसम्म विभिन्न आरक्षण कोटाबाट २६ हजार २ सय ७४ जनालाई स्थायी नियुक्तिका लागि सिफारिस गरिएको हो।
आर्थिक वर्ष २०८१/८२ मा मात्रै आयोगले ६ समावेशी समूहअन्तर्गत ८ सय ४९ पदका लागि विज्ञापन गरेको थियो। सो अवधिमा समावेशी प्रणालीबाट १ हजार ५६ जनालाई स्थायी नियुक्तिको सिफारिस गरिएको आयोगले जनाएको छ।
तीमध्ये महिलातर्फ ३ सय ६५, आदिवासी/जनजाति समूहबाट २७३, मधेसी समुदायबाट २३३, दलितबाट ९६, अपांगता समूहबाट ४६ र पिछडिएको क्षेत्र समूहबाट ४३ जनाले नियुक्ति पाएका छन्।
समावेशी प्रणाली लागू भएपछि महिलादेखि लिएर अल्पसंख्यक र पिछडिएका समुदायका व्यक्तिहरू सरकारी सेवामा पहुँच पुर्याउन सफल भएको आयोगले जनाएको छ। आयोगका अनुसार समावेशी प्रणालीले सामाजिक न्याय र समान अवसरको अधिकार सुनिश्चित गर्न ठोस भूमिका खेलेको छ।