सुनसरी । असोज १८ देखि २० गतेसम्मको अविरल वर्षाका कारण हरीनगर गाउँपालिकाका विभिन्न वडाहरूमा रहेका बालीहरूमा ठूलो क्षति पुगेको छ । गाउँपालिकाका वडा नम्बर १, २, ३, ४, ५ र ६ का किसानहरू प्रभावित बनेका छन् ।
कृषि ज्ञान केन्द्रको अनुसार करिब ८६५ हेक्टरमा लगाइएको धान, ५२० हेक्टरमा रहेको तरकारी, र १५० हेक्टरमा लगाइएको केराको बगान बाढी र पानीको कारण डुबानमा परेका छन् । लगातारको वर्षा र जमिनमा पानी जम्दा खेतमा रहेको बाली नष्ट भएको हो ।
स्थानीय किसानहरूले मुख्य धान पाक्ने समयमा बाढी परेकाले उत्पादनमा ठुलो असर परेको बताएका छन् । बाढीका कारण केही स्थानमा तरकारी बाली सड्न थालेको र केराको बोट भासिँदा जरा नष्ट भएको किसानहरूको गुनासो छ ।
गाउँपालिकाले प्रारम्भिक तथ्यांक संकलनको काम अघि बढाएको छ । गाउँपालिका अध्यक्षका अनुसार प्रभावित किसानलाई राहत र पुनः खेतीका लागि आवश्यक सहयोगका कार्यक्रमहरू अघि सारिने तयारी भइरहेको छ ।
स्थानीय कृषक रामलाल यादवले भने, “धान त बाली पाक्नै लागेको थियो, तर पानीले सबै डुबायो, अब त वर्षभरको मेहेनत खेर गयो।”
अविरल वर्षाका कारण नहरहरू र साना खोल्साहरूमा पनि पानीको स्तर बढ्दा बाढीले बस्तीमा समेत प्रवेश गरेको स्थानीयहरूले बताएका छन् ।