विराटनगर – विराटनगरको चर्चित स्मृति व्याण्डले आफ्नो २५ औँ वार्षिकोत्सव मनाउँदै विशेष सम्मान प्राप्त गर्ने भएको छ । आगामी असोज ३१ गते (शुक्रबार) जैन भवनमा आयोजना हुने चौथो संस्करणको विराटनगर म्युजिक फेस्टिवलमा सो व्याण्डलाई सम्मान गरिने कार्यक्रम तय गरिएको छ।
कार्यक्रमका संयोजक सेन्ट्रो महतका अनुसार लाईभ इन्टरटेन्मेन्टको आयोजनामा हुने उक्त फेस्टिवलमा स्मृति व्याण्डको विशेष प्रस्तुति सहित सम्मान कार्यक्रम राखिएको छ। उनले भने, “स्मृति व्याण्डले विराटनगरको संगीत क्षेत्रमा दुई दशकभन्दा बढी समयदेखि योगदान दिइरहेको छ, त्यसको सम्मानस्वरूप यसपटक विशेष अवार्ड प्रदान गर्न लागिएको हो।”
ई.स. २००० सालमा स्थापना भएको स्मृति व्याण्डले देशका विभिन्न सहरहरूमा आफ्नो सांगीतिक प्रस्तुति दिइसकेको छ। हाल समूहमा भोकलमा ज्योति सुब्बा, गिटारमा दिपेन थापा र सुरज थन्दार, बेस गिटारमा दौरभराज वाना र ड्रमरमा विवेक राई रहेका छन्। 
व्याण्डका चर्चित गीतहरू ‘आमा तिम्रो माया’, ‘मेरो पहिलो प्रेम’, ‘जानु छ विदेश’ र ‘सपना हो कि बनेर’ श्रोतालाई निकै मन परेका छन्। युट्युबमा उनीहरूको नवीन एल्बम ‘सार्थक’ समेत चर्चामा रहेको आयोजकले जनाएको छ।
यसअघि स्मृति व्याण्डले स्प्राइट व्याण्ड च्यालेन्जमा समेत उत्कृष्ट पाँच टोलीभित्र स्थान बनाएको थियो। फेस्टिवलमा स्मृति व्याण्डसँगै स्वर व्याण्ड, पूर्ण राई एण्ड दाजुभाइ टिम लगायतका लोकप्रिय कलाकारहरूको प्रस्तुति पनि रहनेछ।
आयोजकका अनुसार विराटनगर म्युजिक फेस्टिवलले स्थानीय कलाकारलाई प्रोत्साहन दिँदै विराटनगरको सांगीतिक संस्कृतिलाई अझ सशक्त बनाउने लक्ष्य लिएको छ।
Top of Form
Bottom of Form