सुनसरी — तिहार पर्वलाई लक्षित गर्दै भारतबाट अवैध रूपमा फूलका माला भित्र्याउने क्रममा प्रहरीले विराटनगर बरगाछीबाट एक पिकअप गाडी नियन्त्रणमा लिएको छ। गाडीमा करिब सात हजार सयपत्रीका माला रहेकाे प्रहरीले जनाएको छ।
सुनसरीको देवाङगञ्ज गाउँपालिका–२ का सतनारायण यादव चालक रहेको को २ च १६३४ नम्बरको पिकअपलाई प्रहरीले नियमित चेकजाँचका क्रममा रोकेर माला बरामद गरेको हो। ती माला भारतमा फर्मालिन प्रयोग गरी प्रशोधन गरिएका थिए। बरामद माला करिब एक लाख २० हजार रुपैयाँ बराबरको रहेको जनाइएको छ।
त्यसैगरी, उक्त गाडीमा ७० केजी बन्डेड तार पनि फेला परेको थियो। प्रहरीका अनुसार चालकले ती सामग्रीको भन्सार बिल वा कानूनी कागजात प्रस्तुत गर्न सकेका थिएनन्।
मोरङ प्रहरी कार्यालयका प्रवक्ता डीएसपी कोपिला चुँडालका अनुसार, बरामद गाडी र सामानलाई आवश्यक कारबाहीका लागि भन्सार कार्यालयमा बुझाइएको छ।
चुँडालका अनुसार, तिहार नजिकिँदै गर्दा भारततर्फबाट अवैध रूपमा वस्तु भित्र्याउने प्रवृत्ति बढ्दै गएको हुँदा प्रहरीले सीमाक्षेत्रमा निगरानी कडा पारेको छ।