सुनसरी- झापा जिल्लाको बिर्तामोड नगरपालिका–१० सत्रविघे क्षेत्रमा बिहीबार साँझ अज्ञात व्यक्तिबाट भएको सिरिन्ज आक्रमणमा एक जनाको ज्यान गएको छ।
स्थानीय खेम ढकाल छिमेकीको घरबाट आफ्नै निवासतर्फ फर्कँदै गर्दा बाटोमै आक्रमणमा परेका थिए। सिरिन्जमार्फत गरिएको आक्रमणपछि गम्भीर घाइते भएका ढकाललाई उपचारका लागि अस्पताल लैजाँदै गर्दा बाटोमै मृत्यु भएको जिल्ला प्रहरी कार्यालयले जनाएको छ।
घटनापछि प्रहरीले आक्रमणमा संलग्न भएको आशङ्कामा सिरहा जिल्लाका २६ वर्षीय दीपेशकुमार सिंहलाई नियन्त्रणमा लिएको छ। प्रहरी प्रवक्ता खगेन्द्रबहादुर खड्काका अनुसार सिंहमाथि आवश्यक अनुसन्धान भइरहेको छ।
हालसम्म सिरिन्जमा प्रयोग गरिएको पदार्थ के हो भन्नेबारे खुल्न सकेको छैन। प्रहरीले घटनाको कारण, आक्रमणको उद्देश्य तथा अन्य सम्भावित संलग्न व्यक्तिबारे थप अनुसन्धान अघि बढाएको जनाएको छ।