सुनसरी — आगामी २१ फागुनमा निर्धारित निर्वाचनका लागि अर्थ मन्त्रालयले कुल १९ अर्ब १५ करोड रुपैयाँ बराबरको स्रोत सहमति प्रदान गरेको छ । मन्त्रालयको पछिल्लो तथ्यांकअनुसार यसमध्ये हालसम्म ६ अर्ब ३६ करोड रुपैयाँ निकासा भइसकेको छ ।
निर्वाचन व्यवस्थापनका लागि निर्वाचन आयोगलाई सबैभन्दा बढी बजेट उपलब्ध गराइएको छ । अर्थ मन्त्रालयले १८ कात्तिकमा आयोगका लागि ४ अर्ब ९६ करोड रुपैयाँ स्रोत सहमति दिएको थियो भने २० पुसमा थप १ अर्ब ७७ करोड ९० हजार रुपैयाँ स्वीकृत गरेको छ । यससँगै आयोगले प्राप्त गरेको कुल स्रोत सहमति ६ अर्ब ७३ करोड ६६ लाख ९० हजार रुपैयाँ पुगेको छ ।
निर्वाचन आयोगलाई १२ मंसिरमा ४ करोड ३१ लाख रुपैयाँ बराबरको पहिलो निकासा दिइएको थियो । आयोगको विवरणअनुसार हालसम्म आयोगका लागि मात्र ६ अर्ब ३१ करोड रुपैयाँ निकासा भइसकेको छ ।
निर्वाचन सुरक्षालाई लक्षित गरी विभिन्न सुरक्षा निकायका लागि पनि ठूलो रकम स्रोत सहमति दिइएको छ । राष्ट्रिय अनुसन्धान विभागका लागि १३ कात्तिकमा २ करोड ८० लाख रुपैयाँ स्रोत सहमति प्रदान गरिएको थियो ।
नेपाली सेनालाई उपकरण खरिद प्रयोजनका लागि २८ मंसिरमा ४ करोड ४२ लाख ५० हजार रुपैयाँ स्वीकृत गरिएको छ भने २० पुसमा थप १ अर्ब ९४ करोड रुपैयाँ बराबरको स्रोत सहमति दिइएको छ ।
यसैगरी गृह मन्त्रालय र मातहतका निकायहरूका लागि निर्वाचन प्रयोजनमा १० अर्ब ३९ करोड रुपैयाँ बराबरको स्रोत सहमति प्रदान गरिएको अर्थ मन्त्रालयले जनाएको छ । मन्त्रालयका अनुसार निर्वाचनलाई सुरक्षित, व्यवस्थित र समयमै सम्पन्न गर्न आवश्यक बजेट व्यवस्थापनलाई प्राथमिकता दिइएको छ ।