सुनसरी- विराटनगरका उद्योगीहरु अमेरिकी डलरको लगातार मूल्यवृद्धि र समय अगावैको निर्वाचनको दबाबले तनावमा छन्। उद्योगीहरूले जनाएका छन् कि डलरको बढ्दो दरले उत्पादन लागत वृद्धि गरेको छ भने निर्वाचनमा सहयोग माग्ने फोनहरूले मानसिक दबाब थपेको छ।
नेपाल उद्योग परिसंघका अध्यक्ष पवन शारडाका अनुसार, डलरको मूल्यवृद्धिले दैनिक उपभोग्य वस्तुदेखि निर्माण सामग्रीसम्मको लागत बढाएको छ। आयातित कच्चापदार्थको मूल्य बढेपछि उद्योगको लागत कम्तीमा १० प्रतिशतले बढेको छ। भन्सार, भ्याट, ढुवानी खर्च र बीमासमेत यसका कारण असरमा परेको छ।
तर अत्यधिक प्रतिस्पर्धा र बजार मन्दीका कारण तयारी वस्तुको मूल्य वृद्धि गर्न उद्योगी असमर्थ छन्। स्टिल उद्योगमा स्पन्ज आइरनको मूल्य किलोमा ७ रुपैयाँ मात्र बढेको छ।
प्लास्टिक उद्योगमा पनि डलरको असर देखिएको छ। वाग्मती मोल्डिङका सञ्चालक मनोज राठीका अनुसार, प्लास्टिक कुर्सीको उत्पादन लागत एक महिनामा ३५–४० रुपैयाँले वृद्धि भएको छ। राठीले भने, “हाल पुरानै मूल्यमा बिक्री गर्न बाध्य छौँ, तर मूल्यवृद्धि अनिवार्य छ।”
प्रशोधित तेलको मूल्यमा पनि प्रभाव परेको छ। दुई महिना अगाडि २३२ रुपैयाँ प्रतिलिटर रहेको सुर्यमुखी तेल अहिले २६२ रुपैयाँ पुगेको छ।
उद्योगीहरूले डलरको मूल्यवृद्धि र निर्वाचन दुवैलाई आफ्नो व्यवसायमा चुनौतीपूर्ण बताएका छन्।