झापा — चालु आर्थिक वर्ष २०८२/८३ को पहिलो चौमासिकमा काँकरभिट्टा नाकाबाट आयात रकम उल्लेखनीय रूपमा बढेको छ। मेची भन्सार कार्यालयका सूचना अधिकारी ईश्वरकुमार हुमागाईंका अनुसार चार महिनामा कुल रु १६ अर्ब २ करोड ५ लाख बराबरका सामान नेपाल भित्रिएको छ।
गत वर्ष यही अवधिमा आयात मूल्य रु १४ अर्ब २८ करोड ८७ लाख थियो, जसको तुलना गर्दा यस वर्ष आयातमा उल्लेख्य वृद्धि भएको देखिन्छ।
तर, निर्यात भने उल्टै घटेको छ। चालु वर्षको पहिलो चौमासिकमा काँकरभिट्टाबाट रु ७ अर्ब ९६ करोड ७ लाख बराबरका सामग्री मात्र बाहिरिएको छ। गत वर्ष सोही अवधिमा निर्यात रु ८ अर्ब ३० करोड २७ लाख थियो।
काँकरभिट्टा नाकाबाट पर्ने प्रमुख निर्यात वस्तुहरूमा अलैँची, चिया, प्लाइउड, भेनिउर सिट, छुर्पी, अम्रिसो, अदुवा, सुठो, मुसुरो तथा फलामे पातालगायतका सामग्री पर्छन्।
यसैबीच मेची भन्सार कार्यालयले चालु आवको पहिलो चार महिनामा आयात–निर्यात कारोबारबाट रु ५ अर्ब ४६ करोड १ लाख ९८ हजार राजस्व संकलन गरेको जनाएको छ।