सुनसरी— धरान उपमहानगरपालिका–१३ जिरो प्वाइन्टमा प्रहरीले ठूलो परिमाणको लागूपदार्थ बरामद गरेको छ। गएराति गोप्य सूचनाका आधारमा गरिएको चेकजाँचका क्रममा मोटरसाइकलमार्फत ल्याइँदै गरेको २५ किलो गाँजा फेला परेको इलाका प्रहरीले जनाएको छ।
प्रहरीका अनुसार सो ओसारफेरमा संलग्न मोटरसाइकल चालक भने घटनास्थलबाटै फरार भएको छ। उनको पहिचान खुल्न बाँकी रहेको र खोजी तीव्र पारिएको इलाका प्रहरी कार्यालय धरानका डिएसपी भीषणबाबू राईले जानकारी दिए।
बरामद गरिएको गाँजा र मोटरसाइकल अहिले इलाका प्रहरी कार्यालय धरानमै राखिएको छ। घटनाको प्रकृति, संलग्न नेटवर्क र स्रोत पहिचान गर्न थप अनुसन्धान जारी रहेको प्रहरीले जनाएको छ।