सुनसरी- झापा र सुनसरी जिल्लाका विभिन्न स्थानमा गरिएको प्रहरी कारबाहीका क्रममा ब्राउनसुगरसहित १२ जनालाई नियन्त्रणमा लिइएको छ।
इलाका प्रहरी कार्यालय गौरीगञ्ज, झापाबाट खटिएको प्रहरी टोलीले नियमित चेकजाँचको क्रममा गौरीगञ्ज गाउँपालिका–२ का मानफ कुमार मेहतालाई ७ ग्राम ब्राउनसुगरसहित पक्राउ गरेको हो।
त्यस्तै, इलाका प्रहरी कार्यालय बुधबारेले मेचीनगर र बुद्धशान्ति क्षेत्रबाट १० जनालाई लागूऔषधसहित नियन्त्रणमा लिएको छ। पक्राउ पर्नेमा मेचीनगर–७ का विमल मेचे, मेचीनगर–११ का प्रविन राई, बासु राजवंशी र सुरेश खड्का, मेचीनगर–८ का कविश मेचे, बुद्धशान्ति–४ का कुमार गुरुङ र राजेन्द्र कुमार थापा, बुद्धशान्ति–३ का सन्दीप सराईली तथा बुद्धशान्ति–१० का घनश्याम माझी रहेका छन्। उनीहरूको साथबाट ४ ग्राम ४५० मिलिग्राम ब्राउनसुगर र नगद ३७ हजार ५ सय रुपैयाँ बरामद गरिएको प्रहरीले जनाएको छ।
यसैबीच, सुनसरीको धरान उपमहानगरपालिकामा पनि लागूऔषध कारोबारीविरुद्ध कारबाही गरिएको छ। वडा प्रहरी कार्यालय धरानले धरान–११ का विकास कार्की र धरान–१२ का अगृश तुलाधरलाई २२० मिलिग्राम ब्राउनसुगरसहित नियन्त्रणमा लिएको हो।
पक्राउ परेकाहरूमाथि लागूऔषध सम्बन्धी ऐनअनुसार थप अनुसन्धान भइरहेको प्रहरीले जानकारी दिएको छ।