विराटनगर — मोरङको विराटनगर महानगरपालिका–१७, मटेरुवाबाट स्रोत नखुलेको ठूलो रकमसहित एक व्यक्तिलाई प्रहरीले पक्राउ गरेको छ।
मंसिर १७ गते कोशी प्रदेश प्रहरी कार्यालय अन्तर्गतको प्रादेशिक अनुसन्धान समूहबाट खटिएको टोलीले भारतबाट नेपालतर्फ आउँदै गरेको को २४ प ७९८४ नम्बरको मोटरसाइकललाई चेकजाँच गर्ने क्रममा रकम फेला पारेको हो।
प्रहरीका अनुसार विराटनगर–१८ का रवि शाह मोटरसाइकल चालक रहेका थिए। उनले साथमा लुकाइछिपाई ल्याएको ६ लाख ४९ हजार ५ सय रुपैयाँ कहाँबाट आएको भन्ने खुलेको छैन। अवैध ठहरिने उक्त रकमसहित उनलाई तत्कालै नियन्त्रणमा लिइएको प्रहरीले जनाएको छ।
पक्राउ परेका शाहलाई आवश्यक अनुसन्धानका लागि इलाका प्रहरी कार्यालय रानीमा राखी थप कारबाही अघि बढाइएको प्रहरीले जानकारी दिएको छ।