इनरुवा । इनरुवा–वबिया सडकखण्डको मगर टोलमा भएको दुःखद सडक दुर्घटनामा एक युवकले ज्यान गुमाएका छन्। इनरुवा–१० जलपापुरका हारुन अंसारी को मोटरसाइकल विद्युत् पोलमा ठोकिँदा मृत्यु भएको हो।
सुनसरी प्रहरीले दिएको जानकारीअनुसार तीव्र गतिमा दौडिरहेको को ७ प ४९०५ नम्बरको मोटरसाइकल अचानक अनियन्त्रित भई सडकछेउको बिजुलीकाे पोलमा ठोकिएको थियो। गम्भीर घाइते भएका अंसारीलाई तत्काल उपचारका लागि अस्पताल पुर्याइए पनि चिकित्सकहरूले उनलाई मृत घोषित गरेका छन्।
प्रहरीको प्रारम्भिक अनुसन्धानमा अंसारीले हेलमेट नलगाई मोटरसाइकल चलाएको प्रमाण फेला परेको छ। तीव्र गतिकै कारण नियन्त्रण गुमेको र दुर्घटना हुन पुगेको प्रहरीको भनाइ छ।
स्थानीयले राति–बेलुका उक्त सडकखण्डमा सवारीको गति नियन्त्रणमा राख्न आवश्यक ट्राफिक निगरानी र चेतनामूलक व्यवस्था थप गर्न माग गरेका छन्।