सुनसरी- काठमाडौँबाट सङ्खुवासभा हुँदै गन्तव्यतर्फ दौडिएको बा ४ ख ५५०२ नम्बरको माइक्रोबस पाख्रिबास नगरपालिका–५ भैंसे नजिकै आज बिहान करिब ६ बजेतिर दुर्घटनाग्रस्त बनेको प्रहरीले जनाएको छ।
दुर्घटनामा सङ्खुवासभा, सभापोखरी–२ की ८२ वर्षीया सबिता कालाखेतीको घटनास्थलमै मृत्यु भएको धनकुटाका प्रहरी उपरीक्षक सरतकुमार थापा क्षेत्रीले पुष्टि गरे।
घाइतेमध्ये चालक जितेन्द्र बुढाथोकीसहित दुई जनाको अवस्था गम्भीर रहेको र दुबैलाई थप उपचारका लागि धरानस्थित अस्पताल पठाइएको जानकारी दिइएको छ।
अन्य १२ जना सामान्य घाइतेहरू धनकुटा अस्पतालमा उपचाररत छन्।
दुर्घटना कसरी भएको हो भन्नेबारे यकिन कारण खुल्न बाँकी रहेकाले प्रहरीले घटनास्थलको मुचुल्का संकलनसहित आवश्यक अनुसन्धान अघि बढाएको जनाएको छ।