काठमाण्डौ – देशभर नयाँ मतदाता सूचीकृत हुने प्रक्रियामा उल्लेख्य वृद्धि देखिएको छ। निर्वाचन आयोगका अनुसार राष्ट्रिय परिचयपत्र प्रयोगकर्ता मात्रै २ लाख २५ हजार ५७५ जनाले मतदाता नामावलीमा नयाँ रूपमा दर्ता गराइसकेका छन्।
यससँगै बायोमेट्रिक प्रणालीमार्फत थप ३ लाख २ हजार ६२ जनाले नामावलीमा नाम चढाएका छन्। आयोगले दिएको तथ्यांकअनुसार, नामावली संकलन खुला गरिएको मितिदेखि कात्तिक ३० गतेसम्मको अवधिमा यो संख्या दर्ता भएको हो।
आयोगका अनुसार मंसिर ५ गतेसम्म देशभर मतदाता नामावली दर्ता प्रक्रिया निरन्तर रहनेछ। राष्ट्रिय परिचयपत्र नम्बर भएका नागरिकले अब घरबाटै अनलाइनमार्फत दर्ता फारम भर्न सक्ने सुविधा सरकारले उपलब्ध गराएको छ।
आयोगले युवा, नयाँ मतदाता र पहिलोपटक मतदान गर्न तयारीमा रहेका सबैलाई समयमै नाम दर्ता गराउन अनुरोध समेत गरेको छ।