विराटनगर । कोशी प्रदेशका मुख्यमन्त्री हिक्मत कुमार कार्कीले किरात धर्मका महान् समाजसुधारक महागुरु फाल्गुनन्द लिङदेनको शिक्षाले आजको समाजलाई सत्य, अहिंसा र एकताको बाटोमा अघि बढ्न प्रेरणा दिएको बताएका छन्।
फाल्गुनन्दको जन्मजयन्तीको अवसरमा जारी शुभकामना सन्देशमा मुख्यमन्त्री कार्कीले बाल्यकालदेखि नै समाज सुधारमा लाग्नुभएका फाल्गुनन्दले किरात धर्म, संस्कृति र मौलिक परम्पराको संरक्षणमा महत्वपूर्ण योगदान पुर्याएको उल्लेख गरेका छन्। उनले भने, “नेपाल बहुजातीय, बहुभाषिक र बहुसांस्कृतिक मुलुक भएकाले सबै जात, भाषा, धर्म र संस्कृतिको संरक्षण र सम्बद्र्धन राज्यको प्रमुख दायित्व हो।”
मुख्यमन्त्री कार्कीले फाल्गुनन्दले दिएको ‘सत्य बोल्ने, अहिंसा अपनाउने र नारीको सम्मान गर्ने’ सन्देश आजको समाजका लागि अझ सान्दर्भिक रहेको उल्लेख गर्दै शान्त, समृद्ध र सहिष्णु समाज निर्माणका लागि सबैलाई महागुरुका आदर्शबाट प्रेरित हुन आह्वान गरेका छन्।
उनले कोशी प्रदेश सरकार भाषा, संस्कृति र लिपिको संरक्षणमा प्रतिबद्ध रहेको जनाउँदै संविधानले सुनिश्चित गरेको भाषिक अधिकारलाई व्यवहारमा कार्यान्वयन गर्ने तयारी भइरहेको बताएका छन्।