काठमाडौँ ।
आगामी फागुन २१ गते हुने प्रतिनिधिसभा निर्वाचन नजिकिँदै गर्दा राजधानीवासी मतदाता नामावलीमा नाम दर्ता गराउन उत्साहित भएका छन्। काठमाडौँस्थित जिल्ला निर्वाचन कार्यालयमा विगत केही दिनयता सर्वसाधारणको भीड देखिएको छ।
कार्यालयका अनुसार देशभरका ७७ वटै जिल्लाबाट एकैसाथ नाम दर्ता कार्य भइरहेकाले सर्भरमा कहिलेकाहीँ समस्या देखिए पनि प्रक्रिया सहज र झन्झटमुक्त छ। सेवाग्राहीहरूका अनुसार लामो समय लाइनमा बस्नुपरेको छैन र दर्ता प्रक्रिया सहज रूपमा सम्पन्न भइरहेको छ।
पहिलो पटक नाम दर्ता गर्न आएकी अंकित बरालले भनिन्, “मतदाता बन्न पाउँदा निकै खुशी लागेको छ। हामी जेनजी पुस्ताका हौँ, अबको नेतृत्व युवाको हातमा हुनुपर्छ भन्ने लाग्छ।”
जिल्ला निर्वाचन कार्यालयकी सूचना अधिकारी सिर्जना रायमाझीका अनुसार सर्भरमा चाप बढे पनि काम निरन्तर चलिरहेको छ। उनले मतदान गर्न योग्य तर नाम नदिएका नागरिकहरूलाई बाँकी समयभित्र अनिवार्य रूपमा नाम दर्ता गर्न आग्रह गरेकी छन्।
निर्वाचन आयोगका अनुसार सात दिनपछि नाम दर्ता प्रक्रिया बन्द हुनेछ र यस अवधिभित्र नाम दर्ता नगरेका नागरिकले आगामी निर्वाचनमा मतदान गर्न पाउने छैनन्।