विराटनगर । भन्सार राजस्व छलीको आरोपमा पक्राउ परेका विराटनगर–१७ का कुन्दन मण्डलमाथि राजस्व अनुसन्धान विभागले अनुसन्धानको दायरा विस्तार गरेको छ। बिहीबार राजस्व अनुसन्धानको टोलीले मण्डलको घरमा छापा मारी कागजात र सम्भावित प्रमाण संकलन गरेको हो।
मंगलबार विराटनगर भन्सार परिसरबाट भन्सार राजस्व छलीको आशंकामा एउटा ट्याक्टर नियन्त्रणमा लिएपछि मण्डल पक्राउ परेका थिए। हाल उनी इलाका प्रहरी कार्यालय रानीको हिरासतमा रहेका छन्। यसै क्रममा बुधबार विराटनगर–६ स्थित बुद्धपूजा ढुवानी सेवाबाट मण्डलसँग सम्बन्धित ३४ पोका कपडा बरामद गरिएको थियो।
राजस्व अनुसन्धानका अनुसार मण्डलले भन्सारको प्रज्ञापनपत्रमा उल्लेख नभएका अतिरिक्त सामान भित्र्याउने गरेको आशंका छ। सोही आधारमा बिहीबार उनको घरमा छापा मारिएको भए पनि तत्काल कुनै ठोस प्रमाण भेटिएन। तथापि, अनुसन्धान टोलीले केही कागजात र विवरण संकलन गरेको जनाइएको छ।
मण्डलले भन्सार क्लियरिङ एजेन्ट सौगात पोखरेलमार्फत सामान भित्र्याउने गरेको बताइएको छ। यस घटनामा एजेन्ट पोखरेलसहित भन्सारका केही कर्मचारी पनि संलग्न हुनसक्ने प्रारम्भिक अनुमान अनुसन्धानकर्ताहरूले गरेका छन्। राजस्व अनुसन्धान विभागले अब डिजिटल कारोबार, ढुवानी सेवा र भन्सार जाँचपास प्रक्रियासम्बन्धी थप विवरण संकलन गर्ने तयारी गरेको जनाएको छ।