विराटनगर । भारतको बिहारमा आगामी विधानसभा निर्वाचनलाई लक्षित गर्दै प्रधानमन्त्री नरेन्द्र मोदी अररिया आउने भएपछि मोरङ र सुनसरीका सीमा नाकामा सुरक्षा कडाइ गरिएको छ। भारतीय पक्षले बिहारका सीमावर्ती क्षेत्रमा आवतजावतमा निगरानी कडा पारेको छ भने नेपालतर्फ पनि सशस्त्र प्रहरीले चेकजाँच र सुरक्षामा सतर्कता बढाएको छ।
सशस्त्र प्रहरी बल सीमा सुरक्षा अन्तर्गत रानीका प्रहरी नायब उपरीक्षक विकास खतिवडाका अनुसार, भारतले आफ्ना सुरक्षालाई ध्यानमा राख्दै कडाइ गरेको हो। उनका अनुसार यसअघि पनि सामान्य निगरानी गरिएको भए पनि बिहीबार मोदीले अररियामा सम्बोधन गर्ने सभालाई मध्यनजर गर्दै अझ कडाइ गरिएको छ।
बिहारको आगामी निर्वाचन नोभेम्बर ११ तारिखमा हुने भएकाले भारतीय पक्षले नोभेम्बर ८ देखि सीमा सिल गर्ने तयारी गरेको छ। त्यसअनुसार मोरङ र सुनसरीका सीमामा नेपाली सुरक्षाकर्मीले समेत अतिरिक्त सतर्कता अपनाएका छन्।
बिहारका १८ जिल्लामा बिहीबार नै मतदान हुँदैछ भने अररिया सहितका जिल्लामा नोभेम्बर ११ तारिखमा मतदान हुनेछ। सुरक्षाकर्मीहरूले सीमामा आवतजावत गर्ने व्यक्तिहरूको विस्तृत विवरण लिँदै निगरानी कडाइ गरेका छन्।